ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានប្រាប់ប្រធានចារកម្មសឹង្ហបុរីថាភាពជោគជ័យនៃកិច្ចប្រជុំអាស៊ានដែលកម្ពុជាបានដឹកនាំគឺជាជោគជ័យដែលមានតម្លៃ សម្ដេចក៏បានប្រៀបធៀបពាក្យថា ជោគជ័យដ៏មានតម្លៃនេះមកកាន់ជោគជ័យនៃសន្ដិភាពដែលកម្ពុជាទទួលបានផងដែរ។

ថ្លែងនៅចំពោះមុខនិស្សិតជិត ៥ពាន់នាក់ក្នុងពិធីចែកសញ្ញាបត្រដល់និស្សិតវិទ្យាស្ថានបច្ចេកវិទ្យាកម្ពុជា ព្រឹកថ្ងៃ០១ ខែមីនា ឆ្នាំ២០២៣ សម្ដេចតេជោ ហ៊ុន សែន បានថ្លែងថា សន្ដិភាពដែលកម្ពុជាទទួលបានបច្ចុប្បន្នគឺមានតម្លៃខ្លាំងណាស់ដែលត្រូវតែថែរក្សាការពារឱ្យបានឋិតឋេរគង់វង្ស។

សម្ដេចតេជោបានបន្ថែមថាទំរាំកម្ពុជាមានដូចបច្ចុប្បន្នគឺឆ្លងកាត់ការលំបាករាប់មិនអស់ដែលជាជោគជ័យមួយដ៏មានតម្លៃ។ សម្ដេចបានរម្លឹកពីស្នាដៃរបស់គណបក្សប្រជាជនកម្ពុជាថាបានសង្គ្រោះជីវិតប្រជាពលរដ្ឋខ្មែរ បានចូលរួមដំណើរការស្វែងរកសន្ដិភាពសម្រាប់កម្ពុជា និងដំណើរការអនុវត្តនយោបាយឈ្នះៗ ទំរាំបានសន្ដិភាពដូចបច្ចុប្បន្ន។

សម្ដេចតេជោបន្ថែមថាបច្ចុប្បន្នកម្ពុជាមានសន្ដិភាពមានការអភិវឌ្ឍហើយ តែសល់បញ្ហាគ្រាប់មីនមួយប៉ុណ្ណោះដែលត្រូវដោះស្រាយ៕